Ab Teri Zaroorat Bhi Bohat Kam Hai, Meri Jaa'n,

Ab Teri Zaroorat Bhi Bohat Kam Hai, Meri Jaa'n,

Ab Shouq Ka Kuch Aur Hi Aalam Hai, Meri Jaa'n,

Ab Tazkara_e_Khanda_e_Gul, Baar Hai Jee Par,

Jaa'n Waqf_e_Gham Garya_e_Shabnam Hai Meri Jaa'n,

Rukh Pay Tere Bikhri Hui Ye Zulf Siyah_Taab,

Tasweer Pareshani_e_Aalam Hai, Meri Jaa'n,

Ye Kya K Tujhe Bhi Hai Zamaanay Say Shikaayat,

Ye Kya K Teri Aankh Bhi Pur_Nam Hai, Meri Jaa'n,

Hum Saada Dilo'n Par Ye Shab_e_Gham Ka Tasallat,

Maayoos Na Ho, Aur Koi Dam Hai, Meri Jaa'n,

Ye Teri Tawajjo Ka Hai Ejaz K Mujh Say,

Har Shakhs Tere Sheher Ka Barham Hai, Meri Jaa'n,

Ay Nuzhat_e_Maahtaab, Tera Gham Hai Meri Zeest,

Ay Naazish_e_Khurseed, Tera Gham Hai, Meri Jaa'n,

..................................................................................................

Poet : Habib Jalib

Contribute : Zahid Shah