اک کماں اور کوئی تیر بنا دے آ کر

اک کماں اور کوئی تیر بنا دے آ کر

اے مصوّر ! تو یہ تصویر بنا دے آ کر

مَیں نے پھُولوں سے بھرا دیکھا ہے دامن اپنا

کوئی خوشبو کی سی تعبیر بنادے آ کر

اور اک خواب میں گھولے ہوئے لاکھوں رنگ ہوں

مری آنکھوں کی یہ جاگیر بنا دے آ کر

مری پلکوں سے لرزتا ہوا سایہچُن لے

بھیگا بھیگا سا کوئی نیر بنا دے آ کر

جا کے فرقت کو بڑھانے سے تو بہتر ہے یہی

وَصل کو آ ، مری تقدیر بنا دے آ کر

اس کا انجام جو ہونا ہے وہی ہونے دے

ریت پر بھی کوئی تحریر بنا دے آ کر

آسمانوں کے کلیجے میں اتر جائیں گی

تو دعاؤں میں جو تاثیر بنا دے آ کر