Gham say behel rahay hain aap, aap bohat ajeeb hain

Gham say behel rahay hain aap, aap bohat ajeeb hain
dard mein dhal rahay hain aap, aap bohat ajeeb hain

saya-e-Vasl kab say hai aap ka muntazir magar
hijr mein jal rahay hain aap, aap bohat ajeeb hain

apne khilaaf faisla khud hi likha hai ap nay
haath bhi mal rahay hain aap, aap bohat ajeeb hain

Waqt nay aarzu ki lau dair hui bujha bhi di
ab bhi pighal rahay hain aap, aap bohat ajeeb hain

dayeray-war hi to hain ishq k raastay tamaam
raah badal rahay hain aap, aap bohat ajeeb hain

apni talash ka safar khatam bhi kijiye kabhi
khuwaab mein chal rahay hain aap, aap bohat ajeeb hain ....

Poet : Joun Elia