Khamoshi Keh Rahi Hai Kaan Mein Kya ?

Khamoshi Keh Rahi Hai Kaan Mein Kya ?
Aa Raha Hai Mere, Gumaan Mein Kya ?

Ab Mujhe Koi Tokta Bhi Nahi
Yehi Hota Hai, Khandaan Mein Kya ?

Boltay Kiyun Nahi Mere Haq Mein ?
Aablay Par Gaye, Zabaan Mein Kya ?

Meri Har Baat Be-Asar Hi Rahi
Nukhs Hai Kuch, Mere Bayaan Mein Kya ?

Wo Mile To Ye Poochna Hai Mujhe,
Abhi Hoon Main Teri, Amaan Mein Kya ?

Shaam Hi Se Dukaan-E-Deed Hai Band,
Nahi Nuksaan Tak, Dukaan Mein Kya ?

Yoon Jo Takta Hai Aasmaan Ko Tu,
Koi Rehta Hai, Aasmaan Mein Kya ?

Ye Mujhe Chain Kyun Nahi Parta ?
Ek Hi Shakhs Tha, Jahaan Mein Kya ?

Poet : John Elia
Contribute : Zahid Shah