Apne Ehsaas Se Chhoo Kar Mujhe Sandal Kar Do ...

Apne Ehsaas Se Chhoo Kar Mujhe Sandal Kar Do,

K Main Saddiyon Say Adhoora Hon, Mukammal Kar Do,

Na Tumhein Hosh Rahay Aur Na Mujhe Hosh Rahay,

Is_Qadar Toot K Chaho, K Mujhe Pagal Kar Do,

Tum Hatheli Ko Mere Piyar Ki Mehndi Say Rango,

Apni Aankhon Mein Mere Naam Ka Kajal Kar Do,

Is K Saaye Mein Mere Khwaab Dhak Utthein Gay.

Mere Chehrey Pay Chamakta Hua Aanchal Kar Do,

Dhoop Hi Dhoop Hon Main Toot K Barso Mujh Par,

Is_Qadar Barso Meri Rooh Mein Jall_Thall Kar Do,

Jesay Sehraaon Mein Har Shaam Hawa Chalti Hai,

Is Tarha Mujh Mein Chalo Aur Mujhe Thall Kar Do,

Tum Chupaa Lo Mera Dil Aot Mein Apnay Dil Ki,

Aur Mujhe Meri Nigaahon Say Bhi Oojhal Kar Do,

Masla Hon To Nigaahein Na Churaao Mujh Say,

Apni Chahat Say, Tawajjo Say Mujhe Hall Kar Do,

Apnay Gham Say Kaho K Har Waqt Mere Saath Rahay,

Aik Ehsaan Karo, Is Ko Musalsal Kar Do,

Mujh Pay Chhaa Jao Kisi Aag Ki Soorat Jaanaa'n

Aur Meri Zaat Ko Sookha Hua Jangal Kar Do !

Poet : Wasi Shah

Contribut : Zahid Shah

www.zahid-shah.blogspot.com/