Main Is Hisaar Say Nikloon To Kuch Aur Sochoon
Tumhare Pyaar Say Nikloon To Kuch Aur Sochoon
Teri Gali Ke Ilaawa Bhi Aur Qirye Hain
Jo Is Dayaar Say Nikloon To Kuch Aur Sochoon
Tumhare Hijr Ki Sadiyaan Tumhare Wasl K Din
Mein Is Shumaar Say Nikloon To Kuch Aur Sochoon
Racha Howa Hai Tera Ishq Meri Pooron Mein
Main Is Khumaar Say Nikloon To Kuch Aur Sochoon
Ye Mera Jism Ke Maatam Saraa-e-Hasrat Hai
Main Is Mazaar Say Nikloon To Kuch Aur Sochoon
Ye Mujh Mein Kon Mere Raat Din Sambhalta Hai ?
Is Ikhtiyaar Se Nikloon To Kuch Aur Sochoon,
Tumhari Jism Ki Khushbuu Nay Kar Diya Mas-hoor
Is Aabshaar Say Nikloon To Kuch Aur Sochoon
Ye Be-Qaraari Meri Rooh Ka Ujaala Hai
Main Is Qaraar Say Nikloon To Kuch Aur Sochoon ...
Poet : Wasi Shah
Contribute : Zahid Shah
www.zahid-shah.blogspot.com/
No comments:
Post a Comment