Khamosh Ho Kiyon Daad-E-Jafa Kiyon Nahi Detey,

Khamosh Ho Kiyon Daad-E-Jafa Kiyon Nahi Detey,
Bismil Ho To Qaatil Ko Dua Kiyon Nahi Detey,

Wehshat Ka Sabab Ruzan-E-Zinda To Nahi Hai,
Mehar-O-Maah-O-Anjum Ko Bujha Kiyon Nahi Detey,

Ik Ye Bhi To Andaaz-E-Ilaaj-E-Gham-E-Jaan Hai,
Ay Charagaro Dard Barha Kiyon Nahi Detey,

Munsif Ho Agar Tum To Kab Insaaf Karo Gay,
Mujrim Hain Agar Hum To Saza Kiyon Nahi Detey,

Rahzan Ho To Haazir Hai Mataa-E-Dil-O-Jaan Bhi,
Rahbar Ho To Manzil Ka Pata Kiyon Nahi Detey,

Kya Beet Gai Ab K 'Faraz' Ehal-E-Chaman Par,
Yaaran-E-Qafas Mujh Ko Sada Kiyon Nahi Detey !

Poet: Ahmed Faraz
Contribute: Zahid Shah